مىلادىيەدىن بۇرۇنقى 586-يىلى بابىل قوشۇنلىرى يەھۇدىيەنىڭ پايتەختى يېرۇسالېمنى ئىشغال قىلغاندا، قوشنا پادىشاھلىق بولغان ئىدوم بۇ شەھەرنى بۇلاڭ-تالاڭ قىلىشقا قاتناشتى. ئىدوملىقلار قېچىۋاتقان يەھۇدىيەلىكلەرنىمۇ تۇتۇپ بابىللارغا تاپشۇرۇپ بەردى. بابىللار ئۇلارنىڭ بەزىلىرىنى ئۆلتۈردى، بەزىلىرىنى قۇل قىلدى. ئىدوم خەلقى ئەساۋنىڭ ئەۋلادلىرى بولۇپ، ئەساۋ ياقۇپنىڭ ئاكىسى ئىدى، ياقۇپنىڭ ئەۋلادلىرى يەھۇدىيەلىكلەر ئىدى. گەرچە ئىدوم خەلقى يەھۇدىيە خەلقى بىلەن قېرىنداش خەلق بولسىمۇ، ئىدوملۇقلار يەھۇدىيەلىكلەرگە ھېچقانداق ھېسداشلىق قىلمىدى.
كۆپ قىسىم يەھۇدىيەلىكلەر سۈرگۈن قىلىنغاندا، ئوبادىيا پەيغەمبەر يېرۇسالېمدا قالدۇرۇلغانىدى. ئۇ، ئىدوملۇقلارنىڭ، بېشىغا كۈن چۈشكەن قوشنىلىرىغا رەھىمسىزلەرچە مۇئامىلە قىلغانلىقىنى ئەيىبلەيدۇ ۋە ئۇلارنىڭ ھالاك بولىدىغانلىقىدىن ئالدىن بېشارەت بېرىدۇ. ئۇ، خۇدانىڭ ئۆز خەلقىنىڭ شان-شەرىپىنى ئەسلىگە كەلتۈرىدىغانلىقىنى ۋە پادىشاھلىقنىڭ پەرۋەردىگارغا مەنسۇپ بولىدىغانلىقىنى ئالدىن ئېيتىدۇ.
